XOCALI RAYON İCRA HAKİMİYYƏTİNİN TƏŞKİLATÇILIĞI İLƏ ÖN XƏTDƏ XİDMƏT EDƏN ƏSGƏR VƏ ZABİTLƏRLƏ MÜTƏMADİ GÖRÜŞLƏR KEÇİRİLİR

         Xocalı Rayon İcra Hakimiyyətinin təşkilatçılığı ilə Goranboy rayonunda yerləşən “N” saylı hərbi hissənin ön xətdəki bölmələrində xidmət edən əsgər və zabitləri ilə mütəmadi görüşlər keçirilir. Görüşlərdə əsgər azuqəsi hazırlanır, Xocalı rayon məktəblilərinin Azərbaycan əsgərinə böyük məhəbbətlə yazdıqları məktublar əsgərlərə çatdırılır, əsgərlərin əhval-ruhiyyəsinin artırılması məqsədilə konsert proqramları təşkil edilir. 
        Ənənəvi hal alan görüşlərin biri 26 oktyabr tarixdə Xocalı Rayon İcra Hakimiyyətinin başçısı Şahmar Usubovun, Millət vəkili Elman Məmmədovun, Xocalı rayon prokuroru Kamran Məmmədovun, Xocalı RİHA-nın Ərazi idarəetmə və yerli özünüidarəetmə orqanları ilə iş şöbəsinin müdiri Səxavət Hüseynovun və  bir qrup müharibə əlillərindən ibarət nümayəndə heyətinin iştirakı ilə baş tutub. Nümayəndə heyəti ön xətdə xidmət edən əsgər və zabitlərin xidmət və məişət şəraiti ilə tanış olub, onlara televizor hədiyyə ediblər.
        Xocalı rayon İcra Hakimiyyətinin başçısı Şahmar Usubov və digər natiqlər Vətənimizin keşiyində dayanan əsgərlərə çətin və şərəfli xidmətlərində uğurlar diləyib, onlara qələbə sevinci arzulayıblar.

“XOCALININ SƏSİ”