"Xocalının səsi" qəzetinə Milli Qurtuluş Günü münasibətilə müsahibə verən Azərbaycanın ən ağır günlərində xalqımızın xilaskar oğlu, ümummilli lider Heydər Əliyevin qətiyyətlə və cəsarətlə hakimiyyətə qayıtmağının zərurətini hayqıran şəxs - Bəşirov Şükürdür.
Hələ uşaqlıq illərində onun efirdə çıxışına baxıb, onun kim olduğu haqqında düşünərdim. Görəsən bu uzaqgörən, müdrik insan kimdir ki, çoxlarının deyə bilmədiyi sözü cəsarətlə və əminliklə deyə bilmişdir. Mübaliğəsiz deyə bilərəm ki, Şükür müəllimlə olan müsahibə mənə mənəvi dəyər qatdı. Çünki, etibarı və sadəliyi ilə etimad qazanmış bir insanla həmsöhbət olmaq, bunun mahiyyətini başa düşən insan üçün böyük əhəmiyyət kəsb etməlidir.
Bəşirov Şükür İfrat oğlu 1954-cü ildə Laçın rayonunda anadan olmuşdur. 1976-cı ildə ailəsi ilə birgə Xocalı şəhərinə köçmüşdür. 1979-cü ildə Dağlıq Qarabağın Martuni (hazırda Xocavənd) rayonunda süd zavodunda sex rəisi vəzifəsində işləyib. Dağlıq Qarabağ hadisəsinə qədər orada işləyib, hadisələrdən sonra 1988-ci ildə Xocalıya qayıtmışdır. Xocalıda Dağlıq Qarabağın icması nəzdində açılan mağazaların birində 1995-ci ilə qədər müdir vəzifəsində çalışıb. Hazırda Xocalı MKS-də təsərrüfat işləri üzrə müdir vəzifəsində işləyir. İki övlad atasıdır.
Şükür müəllim "Xocalının səsi" qəzetinə müsahibə verərkən bildirdi ki, 1988-ci ilin oktyabrın 20-də ermənilər Martunidə ilk dəfə onun evini yandırıb. 1988-ci ilin oktyabr ayının 20-də işinin bərpası üçün Moskvaya gedib. Moskvada Qorbaçovdan savayı bütün rəhbərlər ilə görüşü olub. İş yerinin bərpası mümkün olsa da, ancaq ermənilər işləməyə imkan verməyib. Moskvada Respublikamızın daimi nümayəndəliyində ilk dəfə Heydər Əliyevin Azərbaycana rəhbərlik etməsi təklifini verib. Ona indiki vəziyyətdə bu təşəbbüsə maneə yaradacaq qüvvələr olduğu bildirilib. Bu tarixi fakt "Pravda", "İzvestiya", "Komsomolskaya Pravda" qəzetlərində və digər kütləvi informasiya vasitələrində nəşr olunmuşdur.
Xocalı faciəsinin canlı şahidi olan Bəşirov Şükür xocalıların ağır günlərini dərin hüznlə xatırlayır. Xocalı soyqırımını XX əsrin ən dəhşətli soyqırım aktı adlandırır. Şükür müəllim ailə üzvləri ilə birgə 4 gün meşədə qalmışdır. Onların pərən-pərən düşdüyü meşədə 500-dək xocalılar düşməndən canlarını qurtarmaq üçün nicat yolu axtarmışlar. Yoldaşı, bacısı əsir düşmüşdür. Sonradan əsirlikdən xilas olunmuşlar. Qocaların, qadınların, körpələrin şəhid olduqlarını öz gözləri ilə görüb.
Xocalı faciəsindən sonra mart ayının 2-də Ağdam şəhərində Xalq Cəbhəsi binasının qarşısında böyük mitinq təşkil olunan zaman Bəşirov Şükür ailə üzvləri ilə birgə həmin mitinqdə iştirak edib. Mitinqdə çıxış edən Şükür müəllim qətiyyətlə "Azərbaycanı bu bəladan ancaq Heydər Əliyev qurtara bilər. Əgər Azərbaycan xalqı özündə iradə tapıb Heydər Əliyevi hakimiyyətə gətirməsə, Laçın və Şuşa işğal olunacaq" şüarlarını səsləndirib. Şükür müəllim bu sözləri Azərbaycanda hərcmərcliyin baş alıb getdiyini, səriştəsiz rəhbərlərin ucbatından dövlətin məhv olmaq üzrə olduğunu görərək söyləmişdir. Həmin dövrdə qara qüvvələr Heydər Əliyevin hakimiyyətə qayıtmasına razılıq vermədilər və nəticədə 20% torpaqlarımız işğal olundu. Heydər Əliyev həmin dövrdə hakimiyyətdə olsaydı Azərbaycanın torpaqları işğal olunmazdı.
Ümummilli lider Heydər Əliyev hakimiyyətə qayıtdıqdan sonra Bəşirov Şükürün çıxışlarına baxmış və Teleradio Şirkətinin sədri Nizami Xudiyevə Şükür müəllimlə görüşün təşkili üçün tapşırıq vermişdir. Görüş 1997-ci il iyun ayının 16-da təşkil olunub. Ancaq müəyyən səbəblərdən görüş iyunun 17-də baş tutmuşdur. Səmimi söhbətlər əsasında keçən görüş 1 saat, 40 dəqiqə davam etmişdir. Ulu Öndər Bəşirov Şükürlə yaxından tanış olmaq marağında olduğunu qeyd etmişdir. Azərbaycan xalqının dahi şəxsiyyəti Şükür müəllimin mövcud şəraitdə cəsarətli çıxışını yüksək dəyərləndirmişdir. Heydər Əliyev Bəşirov Şükürü Azərbaycan xalqının əsl qəhrəmanı adlandırmışdır. Şükür müəllim ümummilli liderlə görüşünü çox böyük qürur hissi və fəxrlə ifadə edir.
Həmsöhbətim Azərbaycanın gündən-günə sürətlə inkişaf etməyinin təməlində ümummilli lider Heydər Əliyevin dühasının olduğunu söylədi. Bəşirov Şükür ölkəmizin uğurlu gələcəyinə inamını vurğuladı. O, fikirlərinə əlavə etdi ki, Vətənimizi dərin məhəbbətlə sevməliyik. Əminliklə bildirdi ki, Möhtərəm Prezidentimiz İlham Əliyevin rəhbərliyi ilə tezliklə düşmən tapdağında qalan torpaqlarımızı işğaldan azad edəcəyik.
Qalib BƏYMƏMMƏDOĞLU