Bu saytda yenilənmələr gedir

"XOCALININ SƏSİ" QƏZETİ
9 İYUL 1991-Cİ İL TARİXDƏN
İŞIQ ÜZÜ GÖRÜR

"NU RAXMAN POQODİ!" Qasım Qırxqızlının xatirəsinə...

        Əziz dostlar, bu gün "Xocalının səsi" qəzetinin ikinci baş redaktoru, "Qızıl qələm" və "Məhəmməd Əsədov" mükafatları laureatı, "Tərəqqi" medalı ilə təltif edilmiş, Qarabağ və ayrıca Xocalı haqda 10-dan çox kitabın müəllifi, şair və Qarabağ qazisi Qasım Qırxqızlının xatirə günüdür. Dostum 4 il əvvəl 2015-ci ilin bu günkü günü 70 illik yubileyinə (15 dekabr 1945) hazırlıq getdiyi bir vaxtda dünyasını dəyişib.
        Azərbaycanda ilk dəfə azad seçki yolu ilə Kərkicahan qəsəbə XDS İK-nin sədri seçilmiş Qasım Qasımovun həmin vəzifədə işlədiyi və işğalçı, separatçı və terrorçulara qarşı mübarizə apardığı vaxtlarda Qarabağın o vaxtkı faktiki işğalçı rəhbəri Volski ilə bir əhvalatı olmuşdu. Onu oxuculara danışmaqla Qasım müəllimin xatirəsini yad etmək istəyirəm.
        Kərkicahan kəndi ilə Xankəndi şəhəri arasında bir neçə toyuq ferması var idi. Hadisələr başlayanda təsərrüfat dağılmış, binalar boş qalmışdı. Qasım müəllim “sovet sədri” seçiləndən sonra çox ciddi şəkildə bu binalaraı təmir etdirməyə başlamışdı. Məqsəd, orada tikiş, toxuculuq sexləri yaratmaq, Xankəndindəki müxtəlif müəssisələrdən qovulmuş kərkicahanlıları işlə təmin etmək idi. Onun bu hərəkətindən qıcıqlanan ermənilər dəfələrlə təxribat törədərək işi pozmağa çalışsalar da bir şey alınmamışdı. Ona görə də bir dəstə yığıb o zaman Xüsusi İdarəetmə Komitəsinin sədri olan Volskinin yanına şikayətə getmişdilər. Volski də Qasım müəllimi təcili tapdırıb apartdırmışdı yanına.
        Qasım müəllim Volskinin kabinetinə girəndə görür ki, burada 25-30 erməni oturub əksəriyyəti də tanıdıqlarıdır. Məsələni anlayır. Volski onu görən kimi “Qasımov, sənə kim icazə verib orada tikinti aparasan?” – deyə soruşur. Artıq özünü cavaba hazırlamış Qasımov deyir: “Tovariş Vəzirov!” Bu həm də o demək idi ki, bu respublikanın rəhbəri var, siz kimsiniz? Volski dərhal əlini uzadıb dövlət telefonunu qaldırır və birbaşa Vəzirova əhvalatı danışaraq izahat tələb edir. Xəttin o başında (indi təəssüf ki, bu başı!) Vəzirov nə deyirsə, Volski dəstəyi Qasım müəllimə uzadır. O, irəli yeriyib dəstəyi alır. Qulağında ildırım çaxır. Vəzirov qışqıra-qışqıra ağzına gələni danışmağa başlayır. Düzdü, çoxunu ermənilərin ünvanına desə də pis-pis söyüşlər söyür. Vəzirovun qışqırıb-bağırmasından danışmağa imkan tapa bilməyəcəyini görən Qasım müəllim, ancaq elə bunları deyə bilir: “Est, tovariş Vəzirov!”, “Ponyal, tovariş Vəzirov!”, “Oldu, tovariş Vəzirov!”, “Budet, tovariş Vəzirov!” və s. Birinci katib dəstəyi atandan sonra Qasım müəllim də öz əlindəkini Volskiyə uzadır. Dəstəyi alıb yerinə qoyan Volski soruşur: “Nu, çto on skazal?” Qasım müəllim yenə də fikirləşmədən “On skazal, idi stroy!” – deyə cavab verir. Ağlı başından çıxan Volski əlini telefona tərəf uzadaraq qışqırır: “Nu, Raxman, poqodi!!!”
        İnanıram ki, fədakar dostum Qasım Qırxqızlının xatirəsi onu tanıyan yaxşı adamların qəlbində onlar yaşadıqca yaşayacaqdır!
Kərim KƏRİMLİ,
şair, yazıçı, jurnalist
Paylaşın:

Teymur Əliyev təşkil etdiyi layihələrdə Xocalı məktəblilərinin təmənnasız iştirak etmələrinə şərait yaradır

        “Gəncə İntellektual School”un idarə heyətinin sədri, gənc ictimai fəal Teymur Əliyev Gəncə təhsilinin inkişafına böyük töhfələr verir. Layihə rəhbərinin təşəbbüsü ilə “Gəncə İntellektual School” tərəfindən uşaq psixologiyasının inkişafı və onların erkən yaşda uğur qazanmağın sirlərinə yiyələnməsi, özlərində inam hissinin artırılması məqsədilə müxtəlif layihələr və seminarlar təşkil edilir. 

        Teymur müəllim şagirdlərə diqqətlə yanaşır, hər biri ilə səmimi söhbətlər aparır. O, şagirdləri yeni biliklər əldə etməyə, uğurlar qazanmağa həvəsləndirməklə yanaşı, hər bir şagirdə diqqət və qayğı göstərərək, mehriban davranaraq, dostluq münasibəti yaradaraq müəllimə, böyüyə hörmət hissi aşılayır. 

        Gördüyü təqdirəlayiq işlərlə cəmiyyət arasında böyük nüfuz qazanan Teymur müəllim xeyirxah işləri ilə də ürəkləri fəth edir. Teymur Əliyev bir çox şagirdlərə təmənnasız kömək edir, bilik yarışlarında və müxtəlif mövzulu seminarlarda iştirak etməsinə şəarit yaradır. 

        Mənim Teymur müəllimin fəaliyyəti ilə əvvəllər qiyabi tanışlığım var idi. Vətənpərvər gənclə həmsöhbət olarkən onun haqqında təsəvvürlərimdə yanılmadığımı gördüm. Teymur müəllim ondan təşkil etdiyi layihələrdə Xocalı məktəblilərinin iştirak etməsinə kömək etməsi xahişimi müsbət cavablandırdı. 

        Noyabr ayında Azərbaycan Texnologiya Universiteti və "Gəncə Intellectual School"un təşkilatçılığı ilə şagirdlər üçün təşkil olunmuş “Qarabağ Azərbaycandır!” adlı bilik yarışında və Liderlər Məktəbində Xocalı rayon Kosalar, Yaloba və Əli Kərim adına Başkənd kənd tam orta məktəblərinin şagirdləri iştirak etdilər. “Qarabağ Azərbaycandır!” adlı bilik yarışında Xocalı rayon Əli Kərim adına Başkənd kənd tam orta məktəbinin III sinif şagirdi Hümbətova Aynişan Şahsuvar qızı yüksək nəticə əldə etdiyinə görə diploma layiq görüldü. Liderlər Məktəbində iştirakına görə Xocalı rayon Kosalar kənd tam orta məktəbinin III sinif şagirdləri, Əzimov Hüsü Əlzamin oğlu, Quliyeva Nuray Qalib qızı və V sinif şagirdi Quluzadə Fidan Fuad qızı 3G holoqramlı diplomla təltif edildilər.  

       Valideyn Şahsuvar Hümbətov: Şagirdlərin kiçik yaşlarında bilik yarışlarında iştirak etməsi onların intellektual bilik səviyyəsinin, bacarıq və dünyagörüşünün artmasına müsbət edir. Mən bir valideyn kimi Teymur müəllimə təşəkkür edirəm ki, qızımın bilik yarışında  rüsumsuz iştirak etməsinə şərait yaratdı. 

        Şagird Fidan Quluzadə: Liderlər Məktəbində keçirilən təlimlər mənim gələcəkdə uğurlar əldə etməyimə kömək olacaq. Bizə təlim keçən müəllimlərə təşəkkür edirəm. 

        Teymur Əliyev kimi gənc yaşlarından böyük hörmətə, yaxşı ada sahib olmaq hər kəsə nəsib olmur. Şübhəsiz ki, Teymur müəllimin əziyyətlərindən bəhrələnən şagirdlər gələcəkdə Vətənimiz üçün layiqli övladlar kimi yetişəcəklər. Gələcəyimizin təminatçısı olan şagirdlərimiz aldıqları yüksək təhsillə, faydalı işləri ilə Teymur müəllimin mənəvi haqqını qaytarmış olacaqlar.

        Müraciətimi müsbət cavablandırdığı üçün mən də öz növbəmdə Teymur müəllimə minnətdarlıq edir, ona işlərində müvəffəqiyyətlər arzulayıram. 
Qalib BƏYMƏMMƏDOĞLU,
"Xocalının səsi" qəzetinin redaktoru











        

         

        








Paylaşın:

Şahmar Usubov Şura iclasında çıxışlara münasibət bildirdi, nöqsanların aradan qaldırılması ilə bağlı tapşırıq və tövsiyələrini verdi

        22 noyabr tarixdə Xocalı rayon İcra Hakimiyyəti başçısı yanında növbəti geniş Şura iclası keçirildi. İclasda Xocalı rayon İcra Hakimiyyətinin başçısı Şahmar Usubov, Şura üzvləri, rayonun idarə, müəssisə əməkdaşları iştirak etdilər. 

        Şura iclasını açıq elan edən Şahmar Usubov gündəlikdə duran məsələləri diqqətə çatdırdı. Gündəlikdə Rayon üzrə vergi öhdəliyinin yerinə yetirilməsi vəziyyətinin müzakirəsi və lazımi tədbirlərin görülməsi, Rayonda əmək münasibətləri, əməyin mühafizəsi və əhalinin məşğulluğu sahəsində dövlət siyasətini həyata keçirmək, Rayon Məşğulluq proqramını rayon İHB-nın təsdiqinə təqdim etmək, Səhiyyə obyektlərində təmir işlərinin vəziyyətinin idarə, müəssisə və təşkilatlarda qışa hazırlığın vəziyyəti haqqında və Yetkinlik yaşına çatmayanların alkoqollu içkilər, siqaret satışında, ağır və zərərli işlərdə işlədilməsinin qarşısını almaq məqsədilə reydlər keçirmək və nəticələrini komissiyanın iclasına çıxarmaq haqqında məsələlər müzakirə edildi. 

        Şura iclasında gündəlikdə duran məsələlər haqqında aidiyyəti idarə, müəssisə rəhbərləri və işçiləri çıxış edərək görülən və görülməsi nəzərdə tutulan işlər haqqında geniş məlumat verdilər. 

        Rayonumuzun rəhbəri Şahmar Usubov qarşıda duran vəzifələrdən danışaraq bəzi nöqsanların aradan qaldırılması ilə bağlı tapşırıq və tövsiyələrini verdi.













Paylaşın:

YAP Xocalı rayon təşkilatı partiyanın yaradılmasının 27-ci ildönümü münasibətilə ümumrayon tədbiri keçirib

         22 noyabr tarixdə xocalıların kompakt şəkildə məskunlaşdıqları Goranboy rayonunun Aşağı Ağcakənd qəsəbəsində Yeni Azərbaycan Partiyasının yaradılmasının 27-ci ildönümü münasibətilə ümumrayon tədbiri keçirildi. Tədbirdə Xocalı rayon İcra Hakimiyyətinin başçısı Şahmar Usubov, Yeni Azərbaycan Partiyası Xocalı rayon təşkilatının sədri Vahid Əliyev, partiya üzvləri və rayon ziyalıları iştirak etdilər. 

        Tədbir iştirakçıları əvvəlcə Heydər Əliyev parkına gələrək partiyanın yaradıcısı, Ümummilli lider Heydər Əliyevin xatirəsini ehtiramla yad etdilər, Ulu öndərin xatirəsinə ucaldılan abidənin önünə gül dəstələri düzdülər.

        Xocalı Rayon İcra Hakimiyyətinin akt zalında davam edən tədbirdə Ulu öndər Heydər Əliyevin ruhu bir dəqiqəlik sükutla yad edildi.

        YAP Xocalı rayon təşkilatının sədri Vahid Əliyev tədbiri giriş sözü ilə açaraq, yaranmasından 27 il ötən Yeni Azərbaycan Partiyasının ölkənin ictimai-siyasi həyatında aparıcı rol oynadığını diqqətə çatdırdı. Vahid Əliyev bildirdi ki, Yeni Azərbaycan Partiyasının "qızıl fondu" elan olunmuş 91 nəfər tanınmış ziyalının - "91-lər"in 1992-ci ildə Naxçıvan Ali Məclisinin sədri Heydər Əliyevin Azərbaycanda hakimiyyət uğrunda açıq və fəal mübarizəyə səsləməsi, onun hakimiyyətə qayıdışı üçün müraciətə imza atması mühüm bir addım idi. Ulu öndər ziyalıların müraciətini qəbul etsə də, onun Bakıya gəlməsinə o zamankı səriştəsiz şəxslərin rəhbərlik etdiyi hakimiyyətin maneələr yaratması ucbatından, partiyanın yaradılmasını istəyən insanların bir hissəsi Naxçıvana gedərək, partiyanın təsis konfransını orada keçirməyə nail oldular. Yenə də xalqın Heydər Əliyevə olan inamını bəzi qüvvələr sarsıda bilmədi. Naxçıvanda yaradılan YAP-ın təsis konfransında Ümummilli lider Heydər Əliyev yekdilliklə yeni yaradılan partiyanın Sədri seçildi.

        Azərbaycan üçün ən ağır və məsuliyyətli dövrdə YAP-ın yaranması tarixi zərurət idi. Bugünkü dincliyimizin, əmin-amanlığımızın, bütün sahələrdə dinamik inkişafımızın möhkəm təməli məhz  Azərbaycanımızın, partiyamızın qurucusu Ulu öndərimiz Heydər Əliyevin adı ilə bağlıdır. 

      Vahid Əliyev qeyd etdi ki, YAP rayonumuzda 822 nəfəri öz ətrafında birləşdirən siyasi partiyadır.        

        YAP Xocalı rayon təşkilatının sədr müavini Nəcəf Həsənov çıxışında Azərbaycan xalqının milli inkişaf yolunun və ideologiyasının formalaşmasının məhz Ulu öndər Heydər Əliyevin müstəqil respublikamıza rəhbərliyi dövrünə təsadüf etdiyini vurğuladı. Azərbaycanın müstəqillik yaşı 28 il olsa da, 100 il müstəqil olan dövlətlər qədər ölkəmizin inkişaf yolu keçdiyini dedi. Nəcəf Həsənov qeyd etdi ki, Yeni Azərbaycan Partiyası yalnız 700 mindən çox siyasi fikri eyni olan insanların deyil, eyni zamanda xalqın istək və arzularını təmin edən siyasi partiyadır.

.         YAP Xocalı rayon təşkilatı Qadınlar Şurasının sədri Məlahət İsmayılova məruzə ilə çıxışında bildirdi ki, 1992-ci il noyabrın 21-də Ulu öndər Heydər Əliyevin sədrliyi ilə YAP təsis konfransının keçirilməsi yeni müstəqil Azərbaycanın tarixində parlaq gələcəyin əsasını qoydu. Ancaq o dövrün mənzərəsinə nəzər salanda Azərbaycanın gələcəyi görünmürdü: separatizm meylləri güclənirdi, iqtisadi, sosial vəziyyət kifayət qədər gərgin idi, çəkişmələr getdikcə vəziyyəti daha da ağırlaşdırırdı. Bütün bunların fonunda Ermənistan-Azərbaycan, Dağlıq Qarabağ münaqişəsi, torpaq və insan itgiləri müstəqilliyin də iyitilməsinə gətirib çıxara bilərdi. Xalqın ümid yeri olan Heydər Əliyevin siyasi meydana qayıdışı isə Azərbaycanı bəlalardan xilas etdi, yeni Azərbaycanın gələcək uğurlarına yol açdı. 

        Yeni Azərbaycan Partiyasının qısa müddətdə xalqın sevimli partiyasına çevrilməsinin tək bir səbəbi vardı - xalqın partiyanın sədrinə olan sevgisi, inamı. Çünki zaman göstərdi ki, xalq Heydər Əliyevə arxalanmaqla, onun ətrafında sıx birləşməklə öz gələcəyini təmin etmiş oldu.  

        Yekun olaraq çıxış edən Xocalı rayon İcra Hakimiyyətinin başçısı Şahmar Usubov müstəqilliyimizin ilk illərində Azərbaycanın düşdüyü ağır vəziyyətdən danışdı. Bildirdi ki, səriştəsiz rəhbərlərin hakimiyyəti dövründə Azərbaycan xaosa bürünmüşdü. O dövrki partiyalar torpaqlarımızın işğalına şərait yaratdılar. İndi bir sıra müsəlman ölkələrində çaxnaşmalar yaradılır, həmin ölkələri parçalamağa, dağıtmağa çalışırlar. Azərbaycanda xaos və anarxiya bir daha yaşamamaq üçün xalqımız daim ayıq-sayaq olmalıdır. Özbaşınalığın, hərc-mərcliyin, kütləvi iğtişaşların, aclığın, səfalətin şahidləri olmuş insanlar həmin hadisələri gənc nəslə danışmalıdırlar. 

        Şahmar Usubov vurğuladı ki, nə qədər ki, Azərbaycanda xalq-iqtidar, xalq-ordu birliyi var, bizim Qarabağa qayıtmaq inamımız var. Rayonumuzun rəhbəri çıxışının sonunda hər kəsi Azərbaycanın inkişafı, ərazi bütövlüyü, dövlətçiliyi uğrunda mübarizəyə çağırdı.




























Paylaşın:

DİM-in Gəncə Regional Bölməsinin müdiri Nəsimi Məmmədov məcburi köçkün rayonlarının ümumtəhsil məktəblərində çalışan müəllimlərlə görüş keçirdi


        21 noyabr tarixdə DİM-in Gəncə Regional Bölməsinin müdiri Nəsimi Məmmədov Gəncə şəhəri ərazisində salınmış 600 ailəlik qəsəbədə fəaliyyət göstərən məcburi köçkün rayonlarının ümumtəhsil məktəblərində çalışan müəllimlərlə görüş keçirdi. Görüşdə ötən və cari ilin qəbul qaydaları haqqında və fənn müəllimlərinin yeni təhsil proqramı (kurikulumu) ilə bağlı keçirilmiş qəbul imtahanlarında istifadə olunmuş tapşırıqların müzakirəsi ilə bağlı söhbət aparıldı. Müəllimlər DİM-in əməkdaşı tərəfindən Gəncə şəhərində Respublikanın ali təhsil müəssisələrinə qəbul imtahanları ilə bağlı məlumatların və istifadə olunmuş tapşırıqların müzakirəsi, builki qəbul imtahanlarında açıq tipli tapşırıqların şagird və abituriyentlər tərəfindən cavablandırılması, onların yoxlanılma qaydaları haqqında məlumatlandırılması ilə əlaqədar seminara dəvət olundular.  

        Nəsimi Məmmədov bildirdi ki, Azərbaycan dili, riyaziyyat, ingilis dili, rus dili, tarix, coğrafiya, fizika, kimya və biologiya fənləri üzrə qiymətləndirmə tapşırıqlarının hazırlanması və onların meyarlar əsasında yoxlanılmasına (marker) dair hazırlıq kurslarından keçən müəllimlər sualların yoxlanılmasına cəlb olunacaqlar. Bu da müəllimlərin bilik və bacarıqlarının artırılmasına və işlədiyi müddətdə əlavə əməkhaqqı ilə təmin olunmasına kömək olacaqdır. 




Paylaşın:

Gəncədə yataqxana 26 ildən sonra yenidən tələbələrini qəbul edib

Bu gün UTECA tələbələrinin bir qismi yataqxanaya yerləşdirilib. Rektor, professor Akif Süleymanov yataqxananın açılışında iştirak edib və otaqların açarlarını tələbələrə təqdim edib. Yeni yaradılan şəraitlə tanışlıq zamanı rektor tələbələrə yataqxana qaydalarına əməl etməyi, dərslərə daha ciddi hazırlaşmağı tövsiyə edib.

Azərbaycan Texnologiya Universitetinin 1000 tələbəlik yataqxanası iki korpusdan ibarətdir. Onlardan biri 1981, digəri isə 1989-cu ildə inşa edilərək istifadəyə verilib. 1993-cü ildən hər iki binada məcburi köçkünlər məskunlaşıb. 2013-cü ildə məcburi köçkünlər onlar üçün salınan yeni yaşayış massivinə köçürülüb.

Uzun zaman istifadəyə yararsız qalan yataqxananın bir hissəsi Texnologiya Universitetinin daxili imkanları hesabına bərpa edilib. Hər iki binanın dam örtüyü yenilənib, bir mərtəbədə əsaslı təmir və yenindənqurma işləri aparılıb. Burada tələbələrin rahatlığı üçün hər cür şərait yaradılıb. Otaqlar zəruri məişət avadanlıqları, istilik sistemi ilə təmin olunub. Yataqxananın həyətində yeni yaşıllıq zonası salınıb. Ərazidə futbol meydançasının qurulması da planlaşdırılır.
Qeyd edək ki, Azərbaycan Texnologiya Universitetində təhsil alan tələbələrin 60%-i ayrı-ayrı bölgələrdəndir.










Paylaşın:

XOCALI SOYQIRIMINI UNUTMA!

Üçgünlük körpəsi ilə erməni zindanında amansız işgəncələrə məruz qalan ana

          Müsahibim Xocalıda 4 uşağı ilə erməni quldurları tərəfindən əsir götürülərək 10 günlük girovluq həyatı yaşayan Məhsəti türkü Mehri...

Bizə yazın

Ad

E-posta *

Mesaj *

Ən çox oxunan

Blog Arşivi