Ümummilli lider Heydər Əliyevin xalqın təkidi ilə hakimiyyətə qayıdışından
sonra Azərbaycan səmaları üzərindən qara buludlar götürülməyə başladı. Gündən-günə
ölkəmiz inkişaf yolunu tutdu. Bununla bərabər, xalqımızın rifahı, uğurlu gələcəyə
olan inamı da artdı. Ulu öndərimizin siyasi xəttini uğurla davam etdirən Cənab
Prezidentimizin rəhbərliyi ilə ölkəmiz yeni inkişaf yoluna qədəm qoydu. Ölkəmizin
nüfuzu, iqtisadi-siyasi gücü artdıqca dünya arenasında mövqeyimiz də gücləndi.
Bütün bu uğurlarla yanaşı, xalqımız Qarabağ intizarı çəkirdi. Qarabağın mənfur
düşmənlər tərəfindən işğal edilməsi dövlətçiliyimizin daha da möhkəmləndirilməsinə bir maneə
idi. 44 gün davam edən haqq savaşımızda Ali Baş Komandanın əmri ilə Azərbaycan
Ordusu Qarabağı azad edərək düşmənə sarsıdıcı zərbələr vurdu və torpaqlarımız azadlığa qovuşdu. İndi yerlə-yeksan edilmiş, dağıdılmış yurd yerlərimiz azad nəfəs
alır və hər bir guşəsi ölkə başçısının göstərişi ilə abadlaşır. Beləliklə,
Xilaskar Ordumuz tarixi Azərbaycan torpaqlarını işğaldan azad etməklə dövlətçiliyimizi
daha da möhkəmləndirdi. Qarabağda icra edilən infrastruktur layihələri Azərbaycanın regionda strateji əhəmiyyətini artırır, o cümlədən iqtisadi potensialını da güclənir. Zəngəzur dəhlizinin açılması isə dövlətçiliyimiz tarixində ən parlaq uğurlardan biri olacaq.
II Qarabağ müharibəsindən sonra Azərbaycanla əməkdaşlıq etmək
istəyən ölkələr bir-biri ilə yarışa keçib. Bu dövlətimizin artan nüfuzundan və regiondakı rolundan xəbər verir. Azərbaycanın
beynəlxalq münasibətlər sistemində artan nüfuzunun və genişlənən əməkdaşlığının
göstəricisilərindən biri də Respublika Günü münasibətilə ümumilikdə 60-dan artıq ölkə rəhbəri tərəfindən yazılmış təbrik məktublarıdır.
ABŞ Prezidentinin Azərbaycan Prezidentini Respublika Günü münasibətilə təbrik
məktubunda ikitərəfli münasibətlərin
çoxşaxəliliyinə xüsusi önəm verildiyi vurğulanır.
Müstəqilliyimizin bərpasından keçən 30 ilə yaxın müddətdə ABŞ və Azərbaycan
xalqlarımız arasında əlaqələri gücləndirərək təhlükəsizlik, enerji və
demokratik idarəetmə məsələlərində birlikdə çalışdığı qeyd edilir. Təbrik məktubunda
həmçinin bildirilir ki, Ağ Ev
Administrasiyası Azərbaycanın enerji layihələrini dəstəkləyir və bu layihələrin
inkişafında maraqlıdır. ABŞ ötən il Cənub Qaz Dəhlizinin işə salınması
ilə Azərbaycanın Avropanın enerji şaxələndirilməsinə verdiyi töhfələri və bu il
Xəzərdəki yatağın Türkmənistanla birgə kəşfiyyatına və işlənməsinə dair
imzaladığı Anlaşma Memorandumunu qətiyyətlə dəstəkləyir.
Eyni zamanda dünyanı təhdid edən terrorla
mübarizədə Azərbaycanın oynadığı rol ABŞ-ın siyasi rəhbərliyi tərəfindən etiraf
olunur.
Gələcəkdə ölkələr arasında münasibətlərin inkişafı yeni perspektivlər üçün yol açıldığı diqqətə çatdırılır. Burada enerji təhlükəsizliyi, regional təhlükəsizlik sahələrində əməkdaşlıq, Cənub Qaz Dəhlizi layihəsinin uğurla icra edilməsi, insan haqlarının qorunması kimi məsələlər xüsusi olaraq vurğulanır.
Azərbaycanla əməkdaşlıq etmək istəyən, yeni iqtisadi əlaqələr qurmaq istəyən digər
ölkələr də ölkəmizi strateji tərəfdaş
kimi dəyərləndirir və dostluq münasibətlərini möhkəmləndirməyə çalışırlar.
Göründüyü kimi Azərbaycan dünyada etibarlı ölkə və iqtisadi əlaqələr qurmaq üçün tərəfdaş dövlət kimi tanınır. Bütün bu uğurların əldə edilməsində
ölkə başçısının apardığı uzaqgörən və müdrik siyasət başlıca rol oynayır.