_1620474318.jpg)
Azərbaycan
dövlətinin qurucusu ümummilli liderimiz Heydər Əliyevin misilsiz xidmətlərindən
biri də özündən sonra layiqli varis yetişdirməsi idi. “Mən ona özüm qədər
inanıram və gələcəyinə böyük ümidlər bəsləyirəm”, - deyən Heydər Əliyevin özünün
layiqli davamçısı kimi xalqımıza təqdim etdiyi İlham Əliyevin prezidentlik fəaliyyəti
bu fikirin təxmini deyil, qəti qənaət olduğunu sübut edir.
Möhtərəm Prezidentimiz İlham Əliyevin
prezidentlik fəaliyyətinə başladığı gündən yüksək idarəetmə qabiliyyətinə
malik, xalqına və vətəninə qəlbən bağlı lider olduğu təsdiqini tapdı. Düşünülmüş
islahatları və müdrik siyasəti ilə Azərbaycanı dünyanın inkişaf etmiş dövlətləri
sırasına çıxardı. Onun siyasətinin mərkəzində insan faktoru dayanır, xalqının
rifah halının yaxşılaşdırılması durur.
Yaxşı xatırlayırıq ki, İlham Əliyev ilk dəfə
prezident seçiləndə ölkədə 600 min yeni iş yerinin yaradılacağını vəd etmişdi. Bəziləri
bunun xəyal olduğunu düşünürdü. İllər keçdi, bu xəyal gerçəyə çevirildi. Bu işlər
bu gün də uğurla davam etdirilir. Əhalinin sosial vəziyyətinin yaxşılaşdırılması
üçün sosial siyasət sahəsində də uğurlar əldə olunub. Əhalinin məşğulluq səviyyəsi
artırılır, yoxsulluq minimuma endirilir.
Pandemiya dövründə dünyanı lərzəyə salan
koronavirusa qarşı mübarizə tədbirlərinin mütəşəkkil formada aparılması Dövlət Başçımızın növbəti uğurlu siyasəti idi. Modul
tipli xəstəxanaların açılması, lazımi qədər vaksinin ölkəyə gətirilməsi və təmənnasız
olaraq əhalinin peyvənd olunması-bütün bunlar insan faktorunun dövlət siyasətinin
diqqət mərkəzində olduğununun təzahürü idi.
Qaçqın
və məcburi köçkünlərin həyat şəraitinin yaxşılaşdırılması üçün yeni müasir
tipli qəsəbələrin salınması, hər bir məcburi köçkünə aylıq müavinətin verilməsi
və digər güzəştlərin tətbiq edilməsi bir daha sübut edir ki, Prezidentimiz
xalqının,hər bir sakininin yanındadır.
Prezidentin təşəbbüsü ilə "ASAN xidmət" mərkəzləri
yaradıldı ki, bu da dövlət orqanlarının fəaliyyətində şəffaflığın artırılması, vətəndaşların
rahat xidmətlərlə təminatı yönümündə aparılan islahatların bir hissəsidir.Təsadüfi
deyil ki, Azərbaycan brendi olan "ASAN xidmət" dünyada böyük maraq doğurub və bu
təcrübə bir sıra ölkələr tərəfindən öyrənilir.
Digər
sahələri inkişaf etdirmək üçün atılan addımlardan ən önəmlisi, əlbəttə ki, iqtisadiyyatın
inkişaf etdirilməsi idi. Cənab Prezidentimizin mühüm qərarları və siyasəti nəticəsində
iqtisadiyyatımız bir neçə dəfə artmağa başladı. Qeyri-neft sektorunun inkişaf
etdirilməsi də iqtisadiyyatımızın inkişafının dayanıqlı olması üçün vacib
addımlardan biri idi. Ölkəyə investisiyaların cəlb olunması, sahibkarlığın
inkişaf etdirilməsi üçün münbit şəraitin yaradılması, Azərbaycan neft və qazının
dünya bazarlarına çıxarılması iqtisadiyyatımızın inkişafına böyük təkan verən
islahatların əsasını təşkil edir.
Məhz iqtisadiyyatımızın güclənməsi imkan verdi
ki, güclü və qüdrətli ordu yaratmaq mümkün olsun. Müharibə şəraitində yaşayan,
torpaqları işğal altında olan ölkə üçün ordu quruculuğu həyati əhəmiyyətə malik
olan məsələlərdən biri idi. Bunu nəzərə alan Prezidentimiz, Ali Baş Komandanımız
İlham Əliyev hakimiyyətin ilk illərindən müasir silahlarla təchiz olunan, yüksək
döyüş qabiliyyətinə malik ordu yaradılması istiqamətində əməli işlər apardı. Bunun
nəticəsidir ki, Azərbaycan ordusu dünyada ən güclü 50 ordu sırasında yer tutur.
Rəşadətli ordumuz Ali Baş Komandanımız İlham
Əliyevin rəhbərliyi altında öz gücünü və döyüş qabiliyyətini 2016-cı ilin aprelində
həm düşmənə, həm də dünyaya nümayiş etdirdi. Bunun
davamı olaraq olaraq 2020-ci ilin sentyabrın 27-dən başlayan və noyabrın 10-da Ordumuzun
Zəfəri ilə nəticələnən 44 günlük Vətən
müharibəsi tariximizə qızıl hərflərlə həkk olundu. 30 il ərzində beynəlxalq təşkilatların
bacarmadığını Rəşadətli Ordumuz Ali Baş Komandanımızın rəhbərliyi altında
xalqımızın dəstəyi və birliyi sayəsində həyata keçirdi və işğal altında olan
torpaqlarımızın böyük bir hissəsini düşmən tapdağından azad etdi. Bu gün də ordu
quruculuğu uğurla davam etdirilir. Erməni separatçılarının təxribatlarına
layiqli cavab vermək, hələ də sülhməramlıların nəzarəti altında olan
torpaqlarımızı işğalçı qüvvələrdən təmizləmək üçün Silahlı Qüvvələrimiz lazımi
tədbirlər həyata keçirir.
Əminik ki, yaxın vaxtlarda Xocalıda da, Xankəndində
də üçrəngli bayrağımızı dalğalandıracağıq!
Zəfər Gününü bizə bəxş etmiş Şəhidlərimizin
Ruhları qarşısında baş əyirik! Qazilərimizə şəfa diləyirik!
Prezidentlik fəaliyyəti dövründə müdrik siyasəti, gərgin
iş fəaliyyəti, qəti addımları ilə ikili standartlar fonunda bütün təzyiqlərə sinə
gərən Prezidentimiz İlham Əliyevə Allah can sağlığı versin!
Zülfü Quliyev,
Xocalı rayon ziyalısı