Şəhidlər xalqın kimliyini, mənliyini
qoruyan ölməz qəhramanlardır
Azərbaycanın bütövlüyü uğrunda, canlarından keçmiş şəhidlərimizin ömür yolu
gənclərimizə hər zaman örnəkdir. Hər bir Azərbaycan vətəndaşı öz milli
qəhrəmanlarını tanımalı, onların keçdiyi həyat yolundan çox şeyləri
öyrənməlidir. Barəsində danışacağım şəhid Vüsal Allahverdiyev düşmən üzərində
əldə edilən tarixi qələbəmizdə öz qəhrəmanlığı, cəsarəti ilə sözün əsil
mənasında qəhramanlıq səlnaməsi yazan igidlərimizdəndir. Hər zaman olduğu kimi
bu gün də bir qurup ziyalı qadınlarımızla bizim üçün hər daim dəyərli olan Hicran
xanımın oğlu şəhid Vüsal Allahverdiyevin ev muzeyini və abidəsini ziyarət
etdik.
Vüsal Allahverdiyev 16 avqust, 1988-ci ildə Azərbaycan Respublikasının
Qubadlı rayonunda anadan olub. 31 avqust 1993-cü ildə məcburi köçkün kimi, ailəsi
ilə Sumqayıt şəhərində məskünlaşıb. 1995-ci ildə Sumqayıt şəhər 23 saylı tam
orta məktəbin 1-ci sinfinə daxil olub.
2004-cü ildə həmin məktəbin 9-cu sinifini bitirib. Daha sonra Qubadlı
rayon 2 saylı tam orta məktəbdə təhsilini davam etdirib. 2006-cı ildə həmin məktəbin
məzunu olub. Kooperasiya universitetinin malliyə və kredit fakultəsinə daxil
olub, 4 ildən sonra isə həmin universteti bitirib. 2010-2011-ci illərdə Gəncə şəhərində
yerləşən N saylı hərbi hissədə həqiqi hərbi xidmət keçib. Atası Tahir
Qafar oğlu Allahverdiyev Birinci Qarabağ müharibəsi
veteranıdır. Ailədə bir qardaş, bir bacı idilər.
Vüsal Allahverdiyev 2020-ci ilin iyulun 12-də
başlayan Tovuz döyüşləri zamanı General-mayor Polad Həşimov şəhid olduqdan
sonra, Səfərbərlik və Hərbi Xidmətə çağırış üzrə Qubadlı rayon şöbəsinə müraciət
edib və könüllü olaraq Orduya yazılıb. Sentyabrın 27-də başlayan Vətən müharibəsində
Füzuli rayonunun Seyidəhmədli kəndində, Cəbrayıl və Xocavənd rayonu istiqamətində
döyüşlərdə iştrak edib, böyük şücaət göstərib. Ən son oktyabr ayının 30-da
Xocavənd rayonunun azadlığı uğrunda gedən döyüşlərdə qəhrəmanlıq göstərib,
lakin döyüş zamanı düşmən gülləsinə tuş gələrək, şəhidlik zirvəsinə ucalıb.
Daha sonra nəşi ailəsinə təhvil verilib və Sumqayıt şəhər Şəhidlər xiyabanında
dəfn edilib.
Azərbaycanın
ərazi bütövlüyünün təmin edilməsi uğrunda döyüş əməliyyatlarına qatıldığı və hərbi
hissə qarşısında qoyulmuş tapşırıqların icrası zamanı vəzifə borcunu şərəflə
yerinə yetirdiyi üçün Azərbaycan Prezidenti İlham Əliyevin 15.12.2020-ci il
tarixli Sərəncamına əsasən Vüsal Allahverdiyev ölümündən sonra "Vətən uğrunda", "Döyüşdə
fərqlənməyə görə" və "Füzulinin azad olunmasına görə" medalları
ilə təltif edilib.
Qərinələr ötür, nəsillər bir-birini əvəz edir. Lakin bizə qələbə sevinci
bəxş edən şəhidlərimiz, torpaq uğrunda canından keçən oğul və qızlarımız heç
vaxt unudulmayacaqlar. Ən ali, müqəddəs və şərəfli zirvə olan şəhidlik
zirvəsinə yüksələnlər aramızda olmasalar da, ürəklərimizdə hər zaman yaşayacaqlar.
Şəhidlər bizim həm nisgilimiz, kədərimiz, ürək
ağrımız, həm də qürurumuz, vüqarımız, fəxrimiz, ölməzliyimiz, örnəyimizdir. Allah, vətən və millət yolunda öz istəyi
ilə canından keçməyə razı olan insanların fəth elədiyi ən yüksək, şərəfli zirvədir
şəhid olmaq. Qərinələr, əsrlər keçməyinə baxmayaraq əsla unudulmayan
insanlardır şəhidlər. Tarix boyu millətləri zəfərdən zəfərə aparan səbəb də vətənə
xidmət etmək və şəhid olmaq arzusu olmuşdur. Canlarından keçməklə xalqın qəhrəmanlıq
dastanını, azadlığını canı ilə qazanıb qanı ilə yazanlardır şəhidlər. Məhz
onların canı və qanı hesabına qazandıqları azadlıq və müstəqillik xalq tərəfindən
heç vaxt unudulmur. Ona görə ki, şəhidlər xalqın kimliyini, mənliyini qoruyan
insanlardır. Onlar bir xalq qəhrəmanı olaraq zəncirləri
qıraraq, zülmətləri yararaq, xalqı işıqlı sabaha aparan, ölümləri ilə ölməzlik
qazanan əbədiyyətə qovuşmuş bəxtiyar insanlardır. Ölüm əslində yoxluq və heçlik
deyil. Əbədi diyara səfərdir. Əbədi diyara səfərdən sonra çoxları çox az müddətlik
də olsa dünyaya yenidən qayıtmaq və xeyirxah, saleh əməllər işləmək istəyəcəklər.
Ancaq şəhidlər yenidən dünyaya qayıdaraq bir daha şəhid olmağı arzulayacaqlar.
Elə bu məqamda böyük şairimiz Bəxtiyar
Vahabzadənin “Şəhidlər” şeirini şəhidimiz
Vüsal Allahverdiyevin timsalında bütün şəhidlərimizin müqəddəs ruhlarına
ittihaf etməklə cəmi şəhidlərimizə Allahdan rəhmət, onların valideyinlərinə səbr
diləyirəm. Vətən sağ olsun!
Şəhidlər
Qatil
gülləsinə qurban gedirkən,
Gözünü sabaha dikdi Şəhidlər.
Üçrəngli bayrağı öz qanlarıyla,
Vətən torpağına çəkdi Şəhidlər…
Zalım öyünməsin zülümləriylə,
Min bir böhtanıyla, min bir şəriylə.
Həqiqət uğrunda ölümləriylə,
Ölümü kamına çəkdi Şəhidlər…
O şənbə gecəsi, o qətl günü,-
Mümkünə döndərdik çox namümkünü,
Xalqın qəlbindəki qorxu mülkünü,
O gecə dağıdıb sökdü Şəhidlər…
Tarixi yaşadıb diləyimizdə,
Bir yumruğa döndük o gecə bizdə.
Yıxıb köləliyi ürəyimizdə
Cəsarət mülkünü tikdi Şəhidlər…
Onlar susdurulan haqqı dindirər,
Qaraca torpağı qiymətləndirər.
Donan vicdanları qeyrətləndirər,
Axı, el qeyrəti çəkdi Şəhidlər…
Bilirik, bu bəla nə ilkdi, nə son,
Ölürkən uğrunda bu Ana yurdun.
Quzu cildindəki o qoca qurdun,
Doğru, düz cildini çəkdi Şəhidlər…
Dözdü hər zillətə, dözdü hər şeyə,
“Dünyada mənimdə haqqım var”,- deyə
Kütləni xalq edən müqaviləyə,
Qanıyla qolunu çəkdi Şəhidlər…
İnsan insan olur öz hünəriylə.
Millət, millət olur xeyri, şəriylə,
Torpağın bağrına cəsədləriylə,
Azadlıq tumunu əkdi Şəhidlər.
Şeyda ƏZİZOVA,
“AranMedia GROUP"-un direktoru,
"Aran Media" qəzetinin baş redaktoru
